مميزات وعيوب تخصص طب الاطفال
سوف نتكلم عزيزي القاري في هذه المدونه عن مميزات وعيوب تخصص طب الاطفال، واهم الاسباب التي تجعلك تفكر في هذا التخصص.
تعريف التخصص
هو تخصص الذي يدرس امراض الخاصه بعمر الانسان منذ الولاده الي سن 18سنه.
مميزات التخصص
1-الجانب العلمي
لو انت من النوع اللي بيحب يقراء كثيرا وبتحب السماعه والقلم
فهذا التخصص ملائم لك ،تخصص متشعب يوجد به كل تخصصات الباطنه في الاطفال .
ولكن في هذا العصر التخصصات العامه في طريقها للانقراض ، واختيار تخصصات دقيقه هو اتجاه عالمي .
لم يعد موجود دكتور اطفال عام،حاليا هتلاقي نفسك واخد تخصص زي مثلا :-
تخصص كلي اطفال
تخصص قلب اطفال
تخصص امراض دم واورام اطفال
تخصص الامراض الوراثيه
تخصص الجهاز الهضمي
كل تخصص من دوووووول هتلاقي بحر من المعلومات وكل يوم فيه جديد .
2-الجانب الاجتماعي
هنا يوجد ميزه وعيب في الجانب الاجتماعي هنتكلم عن الميزه وهي انك هتلاقي الشهره وبسرعه وهتلاقي نفسك صديق لاسر اطفال كتيره ،لكن انت مش هتلاقي الاحترام اللي هيلاقيه زميلك بتاع الجراحه وخصوصا الجراحات الدقيقه زي جراح المخ والاعصاب او زميلك بتاع القلب او بتاع الرمد .
انت كدكتور اطفال هتلاقي تقدير واحترام وهتلاقي معارفك كتيره بحكم عدد المرضي بتوعك كتير.
3-الجانب المادي
هتشتغل من اول يوم في تخصصك وهتلاقي شفتات برايفت من وانت تكليف
التخصص ده زيه زي تخصص التخدير فلوسه بتيجي بدري قوووووووي
انت لو فتحت عياده في منطقه شعبيه وروحتها تلات ساعات في اليوم هتلاقي فلوس حلوه ودي ميزه حلوه جداااا في ظل الظروف الماديه الصعبه اللي احنا فيها .
ولكن طموحاتك الماديه في التخصص ده بلاش تعلي قوي الا لو هتفتح مشروع زي مثلا حضانات او مركز اطفال متكامل وان كان الفلوس اللي هتكسبها مش قليله واحسن من غيرك ولكن مش هتوصل للجراحات .دكتور جراحه الاطفال اللي بيكسبه في عمليه في يوم انت بتكسبه في اسبوع .
مجالات شغل بقي كتيره ومتنوعه
تقدر تشتغل عيادات، تقدر تشتغل في حضانات ، تقدر تاخد برنش متخصص زي قلب وتشتغل ايكو اطفال او قسطره اطفال
تقدر تاخد تخصص نيفرو وتشتغل ديالسيز اطفال او زرع كلي
التحدي الكبير قدامك هو انك تاخد تخصص من اطفال وتشتغل بيه متكتفيش بانك تاخد التخصص كله وتبقي اطفال عام.
4-الجانب الاسري
الجانب الاسري في كل تخصص بيعتمد علي طموحاتك العلميه والماديه ولكن يوجد تخصصات بطبيعتها كويسه لاسرتك لو حابب تعيش حياه اسريه ، واخري لا تتناسب مع ذلك. تخصص طب الاطفال مناسب للحياه الاسريه انت خلصت عيادتك وروحت بيتك تقدر تمارس حياتك عاديه هتلاقي بس الحاجات اللي بيتعرضلها اي طبيب ودي عيوب المهنه مش عيب تخصصك زي مكالمات نص الليل علي شئ تافهه او كشوفات في ساعات متاخره بس الي حد ما مقبول حياتك مش هتتلخبط زي بتاع النسا او الجراحه والتخدير وان كان لو انت نيونات وشغال في حضانه طبعا حياتك هتتبهدل زيهم واكتر
5-فرص السفر
فرص السفر ممتازه في تخصص طب الاطفال دول الخليج متاحه لك لو معاك زماله او ماجستير وبمرتب محترم جدددا
جزر المالديف وبعض الدول الافريقيه
هتلاقي فرص كتير
بريطانيا محتاج منك معادله وكتير من دكاتره الاطفال بيحضروها مع الماجستير نفس المذاكره تقريبا .
6-طبيعه امراض الاطفال
تمتاز امراض الاطفال بانها امراض حاده acute نسبه الشفاء عاليه جدااااا مقارنه بالباطنه مثلا ،مريض الباطنه بيقعد معاك العمر كله لكن الاطفال امراضهم بتخف وحتي الامراض chronic هتلاقي نفسك بتحولها لزميلك في تخصصه او لو هي في تخصصك نسبه الشفاء فيه كويس برضو .
عيوب تخصص طب الاطفال
1-السرقه منه
المقصود كل زمايلك من التخصصات التانيه بياخدوا منك حالات بتاع الباطنه والجراحه ووالممارس العام بيشتغلوا اطفال وبيكتبوا ادويتك ولما الحاله تعك منهم بيحولوها ليك .
2-النظره الاجتماعيه
ممكن تتفق او تختلف معايا لكن نظره الناس لدكتور الاطفال اقل من التخصصات الاخري.
3-التعامل مع الاسره وليس الطفل
دي بقي اكبر عيوب التخصص الطفل مش بيعرف يشكي ولا يقولك اللي تاعبه هتلاقي امه وابوه وسته واخته كلهم بقي هيقوموا بدور الطفل وكلامهم مختلف واسئلتهم كتيره مش هتخلص منهم
حاجه تانيه بقي هتقابلها كتير وهو طب الجده او طب العائله بمعني هتلاقي الام محتاره مابين كلامك وكلام جدتها انت طبيب اطفال وجدتها طبيبه من نوع اخر
والمثال الشعبي بيقول (اسال من جرب ولا تسال طبيب) وهتجيلك جدتها وتقعد تسالك اسئله تختبرك وتقولك اللي بتقوله ده كويس يادكتور بس انا كنت بعمل مع عيالي كذا وكذا ..... طب اخري انت متسمعش عنه .
4- الضغط النفسي
عيب المهنه الذي يلازم كل تخصص هو الضغط النفسي لكن في تخصص طب الاطفال هتلاقي ضغط نفسي من نوع اخر سببه ضعف المرضي بتوعك فاقل ميكروب ممكن يدخله في مضاعفات عنيفه وأقل اسهال او ترجيع ممكن يدخله في جفاف
غير كدا بعض الاطفال اللي بنطلق عليهم الطفل الغالي طبعا كل الاطفال غالين علي اهاليهم بس اقصد طفل وحيد لاسرته او طفل بعد محاولات سنين من دكاتره النسا واهله دافعين كل اللي معاهم فيه
هتلاقي نفسك في ضغط نفسي رهيب قدام هذه الاطفال
5-نيابته مرهقه جداااااااا
نيابه الاطفال في الجامعه جحيم انت شايل عيادات خارجيه وشايل استقبال وشايل حضانات وشايل تدريس انت هتتنفخ حرفيا عدد الكشوفات في كل يوم مهؤل حتي لو مش في جامعه في مستشفي وزراه صحه برضو العياده بتاعت الاطفال مش بتقف حرفيا ولكن للامانه هتتعلم كل الحالات هتشوفها وكل المضاعفات هتمر عليك اللي حاصل علي نيابه جامعه في تخصص اطفال في مصر بيتعلم قووووي
ياسلام بقي لو في ابو الريش اللي هي اطفال مصر حديثا او الدمرداش
مده التخصص
في الجامعه لا جديد مدته زي اي تخصص القانون خمس سنين ولكن فعليا بتحصل علي ماجستير في خلال ثلاث سنوات
اما عن الزماله فمدتها اربع سنين للطبيب المقيم اما هي سنتين فقط للطبيب الحاصل علي ماجستير اطفال.
إرسال تعليق