هنتكلم عن اهم مميزات التخصص وعيوبه، وهنتكلم عن طبيعه شخصيه دكتور النسا وتاثير التخصص علي حياته الشخصيه.
مميزات تخصص النسا والولاده:-
1-الجانب العلمي
علي حسب انت عايز تشتغل ايه في هذا التخصص، يعني وضعك العلمي لما تشتغل حقن مجهري واطفال الانابيب غير لما تشتغل متابعه حمل و اخرك تشتغل القيصريات للحوامل اللي حالتهم منتظمه معاك .
هذا التخصص فيه كل ماهو جديد في علاج تاخر الانجاب ، لو دوست في الجزء ده هتوصل لمرحله علميه متقدمه .
2-الجانب الاجتماعي
طبعا من التخصصات المرموقه، مقدر اجتماعيا وليك وضعك وسط التخصصات الاخري ، وده لان مفيش حد يقدر يمد ايده علي المريض بتاعك ، ده غير كدا 90% منهم لا يطلق عليه لفظ مريض ، فالحمل عمليه طبيعيه وليست مرضي .
3- الجانب المادي
اكثر التخصصات المربحه علي الاطلاق، اكبر ميزه في التخصص ده هو الحانب المادي ، هتشتغل بدري جدااااا، في بدايه حياتك هتتابع حمل وهتحول القيصريات لدكتور اكبر منك وانت هتساعده فيها ، بعد فتره مش كبيره مجرد ما تاخد ماجستيرك هتفتح لوحدك ، لغايه كدا فلوس حلوه قوووووي في التخصص بتاعك هتكسب اكتر من بتاع الجراحه ، ومفيش تخصص غيرك هيوازيهم في الربح من التخصص ،
اما بقي لو عايز تعدي وتبقي في حته لوحدك اتعلم علاج العقم وتاخر الانجاب ، الفلوس في الجزء ده ارقام كبيره جداااا.
4- مجالات شغلك متنوعه
التخصص ده دون غيره فيه كل حاجه درستها في الطب
شغل باطنه وتكتب ادويه هتلاقي ، عندك امراض النسا متنوعه كفايه بس تنظيم الحمل واستخدام وسائل منع الحمل ، غير كدا هتجيلك حالات حوامل وعندهم مشاكل باطنه زي امراض الغدد الدرقيه وهكذا .
شغل جراحه والايفوريا بتاعت الجراحين هتلاقي ، بص مش قصدي علي القيصريه ، فيه شغل جراحات اورام النسا ، علي فكره كتيره جداااا، غير كدا نسبه hysterectomy في الستات كبار السن كتيره مش قليله.
شغل اشعه هتلاقي ، الحته دي بقي ليها ناس مميزه فيها ،السونار و ثلاثيه الابعاد ورباعيه الابعاد وغيرهم بيشتغلوها بتوع النسا مش بتوع الراديو، غير دوبلر الحمل .
اخيرا بقي شغل علاج تاخر الانجاب والحقن المجهري واطفال الانابيب ، بص بقي ده تحدي القرن الحالي ، مجال عظيم جدااااا .
5-فرص السفر
دي ميزه بقي للدكاتره البنات ، لو اخدتي نسا وولاده وحضرتي ماجستير ، وعايزه تسافري ، دوول الخليج العربي، بصي يا دكتوره في مصر اغلب دكاتره النسا رجال وان كان الوضع بيتغير، لكن في دول الخليح مفيش ست بتكشف عند دكتور نسا وولاده راجل ، انت هناك هتبقي دهب ، هيتقدري ماليا جداااااااااا، عيادتك مجهزه باحدث الاجهزه ، هترتاحي انت واسرتك والمستوي المعيش هناك زي اوربا واحسن .
عيوب التخصص
1-الجانب الاسري
اسوء لايف استيل في كل التخصصات الطبيه ومش هتعرف تعيش مع اسرتك ، مفيش اي احترام لخصوصيتك ، الستات هيكلموك في كل وقت علي اشياء مهمه جداااا واشياء تافهه جداااااا.
ولازم ترد ومش هتعرف تخلع يعني لو هتابع حمل هتلاقي واتسك وتليفون شغال طول اليوم ، القيصريات مش اغلب الاوقات انت اللي هتحدد الميعاد ،هتلاقي اوقات لازم تقوم من نومك تولدها.
الفكره في كدا ان المريض مرتبط بيك من اول ما تحمل لغايه لما تولد انت الوسيط بينها وبين ابنها.
2- الضغط النفسي
مش انت دكتور يبقي لازم تتعرض لضغط نفسي ، ولانك بتشتغل جراحه يبقي لازم ضغط نفسي ، ولانك بتتعامل مع حالات لمده كبيره غالبا 9شهور يبقي اكيد هتلاقي ضغط نفسي ،كفايه اقولك post partum hemorrhage
ده كابوس دكتور النسا .
3-طبيعه المرضي بتوعك
ركز معايا في الجزء ده ، ولو بتحب تخصص النسا وعجبك المميزات اللي قولتلك عليها واو تعرفها عدي النقطه دي بلاش تقراها.
قولنا انك مش بتتعامل مع مريضه، انت بتتعامل مع حدث طبيعي جدااا بل هو الحدث الاهم في حياه اي اسره، ده يخليك ايدك علي قلبك طول الوقت حالات السقط او مضاعفات الولاده دي طبيعه الناس في مصر هترميها عليك ، غير كدا بقي هقولك علي اسوء موقفين في حياه اي دكتور نسا وولاده .
الموقف الاولي :-
زوجه حامل ، ماشيه معاك كويس , دخلت تولدها ماتت علي سرير العمليات ، اي كان السبب بقي ، تخيل معايا الموقف كدااا
هتطلع تقول ايه لاسرتها اللي مستنينك تطلعهم بالعيل وتطمنهم علي امه
وتلاقي الفرحه بقي وزغرايط وطبل بلدي وهيصه، موقف لا تحسد عليه، اطمن ده مش بيحصل كتير .
الموقف التاني :-
زوجه انت عاملها حقن مجهري بقالها اكتر من عشره سنين مفيش حمل ، واهو ربنا كرمها علي ايدك وعاملت حقن مجهري وحامل ووصلت لاخر اسبوع في الشهر التاسع من الحمل ، والعيل مات او ولدتها لقيته مشوه ودخل حضانه ومات ،
طبعا انت ملكش اي ذنب ولا هما هيرموا عليك الذنب ، بس انت نفسيا مش هتبقي هتبقي مبسوط ، وللاسف ده وارد يحصل كتير .
4- نيابته مرهقه جدااا
اصعب نيابه علي الاطلاق في معظم مستشفيات جامعات مصر ، وحتي مستشفيات وزراه الصحه فيها ولادات وهتلاقي نيابتك مش مريحه ،
نرجع بقي لنيابه الجامعه ، متعبه جداااااا، مفيش نوم ، هتلف القسم كعب داير ، السناير بتوعك من كتر ما شافوه حدود الادب عندهم والذوق في التعامل بعافيه شويه، مش هيرحموك ، هتتشتم وهتتبهدل حرفيا ، سنه الجينيورتي دي هتبقي اسوء سنه في حياتك ، لو بقي هتاخدها في الدمدراش او في القصر العيني انا بحظرك ، فكر الف مره وانزل شوف بعينك .
مده التخصص
طبعا لو نيابه جامعه زيها زي اي تخصص تلات سنين وهتاخد ماجستيرك.
لو زماله بقي فهي خمس سنين ، ميزتها انها كلها نسا مفيش تقضي في تخصص تاني فتره زي اي تخصص اخر.
شخصيه دكتور النسا
طبعا لكل تخصص شخصيه معينه يجب توافرها لكي تكون مميز، وهكذا دكتور النسا والولاده لابد من توافر سمات لكي يستمر في هذا التخصص
* تحمل الضغط النفسي
* طول البال
* القدره علي الاقناع
* حفظ الاسرار والتكتيم علي خصوصيه المرضي .
كلام ممتاز جدا استمروا
ردحذفالمزيد قادم ان شاء الله
حذف