مش عايز تسافر ، ومش في دماغك تشتغل ، وفي نيتك تتعلم لنفسك ، اي كان بقي علشان نيابتك او علشان نفسك، تعال ندردش هنا شويه ، هحاول اجاوبك علي شويه اسئله زي المفروض اتعلم ايه ؟ ايه افضل المستشفيات ؟ .
ازي استفاد من سنه الامتياز علميا ؟
الاجابه ببساطه لازم
تقراء كتب
تشوف بعينك
تشتغل بايدك .
اولا :- تقراء كويس
اللي قريته في الكليه وكم المعلومات اللي حشروها غصبن عنك او برضاك دي علي عين وراسي ، بس لازم تقراء كتب كلينكال مره تاني ، هتنضف دماغك شويه وتدخلك في مواد العملي ، هتبداء بكتاب بسيط زي امتيازولوجي او روشتولوجي وبعد كدا هتعلي شويه وتقراء كتاب Oxford House officer handout
وخد معاك في سكتك كتاب easy pedia
انت كدا قريت بشكل مبدائي كويس معظم شغل الممارس العام عرفته .
ثانيا :- تشوف بعينك
لازم اي حاجه تشوفها قدامك ، من ابسط حاجه في الطب لغايه اي حاجه تانيه ، لازم تشوفها وتاخد خبرتها ، علشان كدا انزل الاستقبالات وشوف الحالات الي بتجيلهم وتابع العلاج بتاعهم من اول ما يدخلوا لغايه لما يمشي العيان .
احضر عيادات خارجيه وشوف مريض العياده اللي مختلف عن الطوارئ ، وشوف ازي زمايلك الاكبر منك بيكتب روشته .
احضر مرور الدكاتره الاستف في الاقسام وشوف مناقشته مع النواب واسمع تفسيره للتحاليل والاشعه ، وشوفه بيطلب ايه من النائب بتاعه .
احضر رعايات وشوف الحالات المعقده وعيش جو الضغط النفسي العالي ، وتفاعل مع كل عيان .
احضر حضانات اطفال حتي لو مش عايز تاخد اطفال ، خد فكره حتي لو مش هتشتري بكره ، خبره حلوه .
ثالثا :- اشتغل بايدك
انت نزلت وسمعت كلامي وشوفت مره واتنين وتلاته ، يلا اشتغلها بايدك ، متقولش معرفش ، مهو لو مشتغلتش ومغلطتش مش هتعرف طول عمرك ، اوعي تستني يقولولك تعال اشتغل بايدك محتاجينك ، ادخل انت ققولهم عايز اشتغل ، لو قابلك نائب رخم وقالك لا ، سيبكم منه فيه الف واحد غيره ، متخافش العيان مش هيحصلوا حاجه طالما هو واقف معاك ، المره دي هتعملها مش قوي المره الجايه احسن ، اللي بعدها محدش هيعملها زيك، بقولك ايه عايز بلطجي ، مهو زمايلك هيسافروا وهيتعلموا في نظام تعليمي اجباري ، انت هنا لو معملتش كدا مش هتتعلم .
هقراء وهشوف وهشتغل بايدي ، بس فييييييييييين ؟ انزل مستشفيات ايه ؟
اولا مستشفي الجامعه بتاعتك ، اهم مكان تتعلم فيها ، اوعي تسمع كلام زمايلك اللي بيقولك النواب مش فاضيلك والهبل وه ، لا احسن مستشفي تتعلم فيها هي مستشفي جامعتك .
هتكلم بقي عن مستشفيات في القاهره لان 1/2 طلبه الامتياز علي مستوي مصر بيجوا القاهره.
مستشفي القصر العيني :- رقم واحد في مصر ، انا عارف كل واحد هتعصب لجامعته ، بس القصر العيني هي رقم واحد في مصر ، وبيعلموا فيها كويس انزل فولنتير في اي مكان فيها استقبالات او عيادات هتتعلم وطول بالك وانزل في كل التخصصات .
مستشفي الدمرداش :- هي اسم كبير وكل حاجه بس مش احسن مكان ممكن تتعلم فيه ، بس استقبال الباطنه كويس .
مستشفي الساحل :- بص المستشفي دي لازم تمر علي قسم الجراحه ، احسن مكان تتعلم فيها بدايات الجراحه ، هتغرز بعدد شعر راسك ، هتتعلم كل انواع الغرز ، هتدخل تتعقم معاهم وهتساعد ، نواب الجراحه محترمين جدااا ، هتتعلم الجبيره من العظم ، لا هتتعلم كويس، خلص الست شهور بتوع جامعتك وتعال خدلك شهرين الجراحه عندهم .
مستشفي المطريه :- عارفها ؟ طب كويس بلاش تروحها .
مستشفي احمد ماهر :- احسن مستشفي في الباطنه ، الاخصائين بينزلوا الاستقبال .
مستشفي سيد جلال :- من احسن مستشفيات النسا في مصر .
اتعلم ايه ؟
اي حاجه تيجي قدامك اتعلمها ، انت اللي هتتعلمه هيفيدك ، بس هقولك علي اهم الحاجات
في الجراحه:-
اتعلم الغرز ، بجميع انواعها ، اعرف كويس الخيوط ، اعرف ازي تختار الخيوط المناسب ، اعرف تعمل جبيره موقته ، اعرف تفتح خراج ، لو عرفت تفتح زايده افتح بس تحت اشراف .في الباطنه :-
اتعلم تتعالح معظم الحاجات اللي تشوفها ، احفظ الروشتات اللي هتكتبها ،
في الاطفال زي الباطنه اتعلم علاج الطواري
في النسا اتعلم pv واتعلم بدايات السونار ، طب اقولك لو عرفت تتعلم تفتح قيصريات اتعلم واتقنها كمان
طب فيه حاجات بقي اسعي تتعلمها في اي حته ، تركب كانيولات ، تسحب عيانات ، تسحب ABG ، تعطي حقن عضل ووريد ، اتعلم تركب انبوبه حنجريه ، اقولك لو عرفت تتعلم تركب CVP اتعلم و متخافش.
اتعلم اي حاجه يادكتور وقتك واستفيد بيه.
إرسال تعليق